Shërbimet e Drejtorisë Vendore të Kufirit dhe Migracionit Korçë kanë intensifikuar kontrollet në pikat e kalimit kufitar dhe në kufirin e gjelbër, me qëllim parandalimin e lëvizjeve të paligjshme dhe goditjen e krimeve ndërkufitare.
Si rezultat i kontrolleve dhe veprimeve të shtuara operacionale, janë evidentuar dhe goditur dy raste të paligjshmërisë në kufi:
Rasti i parë
Në kuadër të kontrolleve dhe intervistimeve të thelluara nga shërbimet e Policisë Kufitare, në kufirin e gjelbër, në hyrje për në Shqipëri, u ndalua shtetasi P. H., 35 vjeç, banues në fshatin Sovjan, Maliq.
Nga verifikimet rezultoi se ndaj tij Gjykata e Korçës kishte caktuar masën e sigurisë “Arrest në burg”, për veprat penale “Prodhimi dhe shitja e narkotikëve” dhe “Shtytja e të miturve në krim”.
35-vjeçari u kap dhe u vu në pranga nga shërbimet e Policisë Kufitare Kapshticë.
Rasti i dytë
Gjatë kontrolleve të imtësishme, të kryera në bazë të analizës së riskut ndaj shtetasve dhe mjeteve, shërbimet e Policisë Kufitare Kapshticë, në bashkëpunim me shërbimet e DVP Korçë, goditën një tjetër rast të paligjshmërisë në kufi.
Në dalje të Republikës së Shqipërisë, gjatë kontrollit fizik ndaj shtetasit O. J., 21 vjeç, banues në Greqi, pasagjer në një linjë autobusi, iu gjet dhe u sekuestrua një sasi lënde e dyshuar narkotike cannabis sativa.
Në përfundim të veprimeve procedurale, ndaj 21-vjeçarit nisi procedimi penal për veprën penale “Prodhimi dhe shitja e narkotikëve”.
Materialet procedurale për të dy rastet iu referuan Prokurorisë së Korçës, për veprime të mëtejshme ligjore.
