Punimet për ndërtimin e urës së tipit “Bailey” në fshatin Qafzezë janë në ditën e tyre të fundit, duke rikthyer plotësisht kalueshmërinë për banorët e 12 fshatrave të bashkisë Kolonjë.
Ky projekt nisi pasi institucioni i Prefektit të Qarkut të Korçës përcolli shqetësimin e banorëve të zonës te ministri i Mbrojtjes, z. Pirro Vengu, dhe kreu i Agjencisë Kombëtare të Mbrojtjes Civile, z. Haki Çako, me qëllim ofrimin e një zgjidhjeje të shpejtë deri në ndërtimin e një ure përfundimtare dhe të qëndrueshme.
Duke marrë parasysh vështirësitë e komunitetit, i cili pas dëmtimit të urës mbeti pa një lidhje alternative qarkullimi, institucioni i Prefektit të Qarkut e trajtoi situatën me prioritet të lartë.
Falenderim i veçantë shkon për Ministrin e Mbrojtjes z. Pirro Vengu dhe Drejtorin e Përgjithshëm të AKMC-së z. Haki Çako, për reagimin e menjëhershëm dhe mobilizimin e strukturave në ndërtimin e urës Bailey.
Majori i Batalionit të Xhenios të Ministrisë së Mbrojtjes Arben Rira, së bashku me nënprefektin e Kolonjës Adriatik Braçe, sektorin e emergjencave civile të Prefekturës së Korçës, strukturat e vendore të bashkisë, drejtorinë e emergjencave civile të bashkisë Kolonjë dhe inxhinierët e ARRSH-së (Drejtoria Qendër-Lindje), zhvilluan inspektimin pranë urës së Qafzezës.
Gjatë vlerësimit u vendos që në këtë pikë të ndërtohej ura Bailey, me qëllimin e rikthimit sa më të shpejtë të qarkullimit për mjetet dhe banorët.
Tashmë, me angazhimin maksimal të të gjitha strukturave, punimet janë drejt përfundimit dhe ura pritet të vihet shumë shpejt në funksion të komunitetit.
Falenderime për durimin, bashkëpunimin dhe mirëkuptimin e banorëve të zonës!
