Prefekti i qarkut, Nertil Jole, ka reaguar pas dëmtimit të korsisë së biçikletave në aksin rrugor Pogradec–Gështenjas, si pasojë e reshjeve të dendura të ditëve të fundit.
Sipas prefektit, ndërhyrjet e para kanë nisur që sot. Ai ka komunikuar me subjektin që ka kryer zbatimin e punimeve, të financuara nga FSHZH, i cili ka konfirmuar se nesër një skuadër teknike do të dalë në terren për të vlerësuar nga afër dëmtimet.
Jole theksoi se rehabilitimi do të kryhet në kohë të shpejtë, pasi kompania është e detyruar ligjërisht ta riparojë, duke qenë se dëmtimi ndodhet brenda afatit të garancisë.
Situata po ndiqet nga afër nga nënprefekti i Pogradecit në bashkëpunim me ARRSH.
