Korça ka ndezur mbrëmjen e djeshme dritat dekorative të festave të fundvitit, në një event festiv që mblodhi qindra banorë dhe turistë të shumtë që kishin zgjedhur juglindjen për të kaluar fundjavën. Momenti i numërimit mbrapsht u shoqërua me efekte speciale dhe duartrokitjet e të pranishmëve, duke i dhënë qytetit zyrtarisht atmosferën magjike të Dhjetorit.
Vizitorët vinin kryesisht nga qytete të ndryshme të Shqipërisë, por nuk munguan as turistët e huaj. Shumë prej tyre treguan se Korça është kthyer në një traditë vjetore për ta.
Një turist nga Greqia, banues në Xanthi, tha se ky ishte viti i tretë që vizitonte Korçën:
“Çdo gjë këtu është e bukur dhe paqësore. Vij gjithmonë me familjen time. Festat e Dhjetorit janë magjike në Korçë,” u shpreh ai, duke shtuar urimin: “Gëzuar Krishtlindjen dhe Vitin e Ri nga një mik grek i Korçës për gjithë shqiptarët.”
Një tjetër vizitore nga Selaniku tregoi se rikthehet çdo fundvit sepse “Korça ka një atmosferë fantastike dhe ne jemi dashuruar me këtë qytet”.
Kryetari i Bashkisë Korçë, Sotiraq Filo, tha se periudha 6 Dhjetor – 6 Janar e kthen qytetin në “kryeqytetin e festimeve”, ndërsa hotelet janë të rezervuara prej kohësh:
“Korça ndezi dritat e festave dhe mori pamje magjike. Kemi përgatitur një kalendar të pasur aktivitetesh që do të na shoqërojë deri në Janar, me shumë vizitorë nga brenda dhe jashtë Shqipërisë. Të gjitha kapacitetet akomoduese janë të rezervuara prej kohësh,” u shpreh ai.
Gjatë gjithë muajit Dhjetor, Bashkia e Korçës ka planifikuar një kalendar të ngjeshur artistik me shfaqje, koncerte dhe aktivitete festive që do të shoqërojnë banorët dhe turistët në prag të Krishtlindjes dhe Vitit të Ri.
