Zbardhet dosja penale e ngjarjes së rëndë të fund-tetorrit në Bilisht, ku Ilir Topçiu u mor peng dhe u dhunua brutalisht nga Alti Nallbati, i njohur si “Duçja”, vëllai i deputetit të PD Bledjon Nallbati, së bashku me dy persona të tjerë, Marsel Buçi dhe Trajan Çeliku.
Gjykata e Korçës, me vendim të datës 4 nëntor 2025, caktoi masën e sigurisë “arrest me burg” 40-ditor për tre të dyshuarit, të cilët po hetohen për “Heqje të paligjshme të lirisë”, “Plagosje të lehtë me dashje” dhe “Kanosje”, të kryera në bashkëpunim. Aktualisht ata mbahen në paraburgimin e Drenovës, ndërsa familjarët e tyre po kërkojnë pajtim me të dëmtuarin.
Sipas dosjes hetimore, grupi dyshonte se Topçiu kishte “spiunuar” tek shefi i krimeve në Bilisht, çka kishte çuar në procedimin penal të një personi tjetër. Me këtë pretekst, Trajan Çeliku e mori nga banesa ku ishte në “arrest shtëpie”, duke e mashtruar se do ta ballafaqonte me policinë. Në vend të kësaj, e çuan në magazinën e Altin Nallbatit, ku nisi dhuna.
Topçiu deklaron se është goditur brutalisht me grushte e shkelma, derisa humbi ndjenjat, ndërsa Marsel Buçi i fikoi cigaren në ballë dhe e kërcënoi: “Herën tjetër do të të zhduk me acid.” Ekspertiza mjeko-ligjore ka konstatuar hematoma në trup dhe dy plagë djegieje në ballë.
Ngjarja shkaktoi reagim të fortë dhe çoi në shkarkimin e drejtorit të Policisë së Korçës dhe pezullimin e disa zyrtarëve të tjerë në Devoll. Në dëshminë e saj, nëna e Topçiut shprehet se djali për ditë të tëra kishte qëndruar i shtrirë nga dhimbjet dhe se “ka frikë se mos ia vrasin”.
