Ekipi i volejbollit të Pogradecit ka reaguar pas zhurmës së krijuar në media lidhur me kërkesën drejtuar Federatës Shqiptare të Volejbollit për verifikimin e një lojtareje të ekipit të Dinamos. Përfaqësues të klubit theksojnë se bëhet fjalë për një çështje thjesht sportive, të ngritur në përputhje me të drejtat e çdo anëtari të Federatës.
“Ne jemi anëtarë të Federatës Shqiptare të Volejbollit, dhe si çdo anëtar kemi të drejtën të ngremë dyshime në lidhje me sportivitetin e një lojtareje apo një ekipi. Kemi kërkuar nga Federata që, bazuar në pamjet dhe të dhënat që kemi vërejtur, të bëhet një analizë specifike për të vërtetuar nëse kjo lojtare është e përshtatshme për të luajtur në këtë kategori dhe nëse ekziston ndonjë avantazh i padrejtë ndaj lojtareve të tjera,” – u shpreh përfaqësuesi i klubit pogradecar.
Në sqarim thuhet gjithashtu se kërkesa është bërë para ndeshjes me Dinamon, të zhvilluar më 11 tetor, duke u bazuar në ndeshjet që ky ekip kishte zhvilluar më parë me skuadra të tjera.
“Kemi ngritur disa dyshime dhe presim që Federata të bëjë verifikimet e nevojshme. Mënyra se si kjo çështje është trajtuar në media dhe balta që po hidhet mbi ekipin e Pogradecit, është e padrejtë. Pogradeci sot është në vendin e parë falë punës dhe përkushtimit të vajzave tona.”
Klubi kujton se në ndeshjen e fundit me Dinamon, ku ka marrë pjesë edhe lojtarja në fjalë, Pogradeci ka fituar me rezultatin 3–2, përballë një publiku të zjarrtë dhe mbështetjes së qytetarëve pogradecarë.
“Ajo fitore është meritë e vajzave të Pogradecit, që po gjykohen padrejtësisht nga opinioni i gjerë. Ne e mundëm Dinamon në fushën tonë me ekipin e plotë që kishte Dinamo,” – përfundon reagimi.
