Të dielën rikthehet ora diellore, pasi akrepat do të zhvendosen 60 minuta pas. Ndryshimi do të ndodhë në orën 03:00 për t’u ripozicionuar në orën 02:00. Kështu, në mëngjes do të flemë një orë më shumë, por mbrëmjet do të vijnë më herët, pasi do të errësohet më shpejt. Të gjitha pajisjet dixhitale përditësohen në mënyrë automatike, ndërsa manualisht duhet të ndryshojmë vetëm orët analoge.
Ora diellore do të qëndrojë në fuqi deri të dielën e fundit të muajit mars 2026. Qëllimi i këtij ndryshimi është të shfrytëzohet më mirë drita natyrale, duke reduktuar nevojën për ndriçim artificial dhe duke kursyer energjinë.
Në Europë ka pasur shpesh diskutime për aplikimin e vetëm një ore përgjatë gjithë vitit, por deri tani pa rezultat. Në vitin 2018, Komisioni Evropian propozoi të ndalohej ndryshimi gjashtëmujor i orës, duke u bazuar në rezultatet e një konsultimi publik. Një vit më pas, Parlamenti Evropian mori vendimin, por ndryshimi i orës u la në dorë të vendeve anëtare. Më pas, për shkak të pandemisë, gjithçka mbeti pezull.
Në qendër të debatit qëndron vështirësia për të balancuar kursimin ekonomik me zakonet shoqërore dhe personale të secilit prej nesh.
