Prefekti i Qarkut, Nertil Jole, mblodhi Komitetin Rajonal të Zhvillimit të Turizmit për të diskutuar përgatitjet për sezonin dimëror 2025-2026. Pas një sezoni veror me flukse domethënëse turistësh, ky takim synon të forcojë investimet dhe të krijojë premisat për rritjen e turizmit gjatë gjithë vitit.
Një lajm i rëndësishëm është fillimi i konsultimeve për hartimin e “Masterplanit të Zhvillimit të Qëndrueshëm të Turizmit” për rajonin, projekt i bashkëfinancuar nga Agjencia Franceze e Zhvillimit (AFD) dhe Ministria e Turizmit, Kulturës dhe Sportit. Konsultimet do të përfshijnë aktorë institucionalë, bashkitë e qarkut, Universitetin “Fan S. Noli”, si dhe sipërmarrje të suksesshme në sektorin e turizmit dhe agro-turizmit, me qëllim huazimin e modeleve të mira franceze dhe përshtatjen e tyre në kontekstin lokal.
Institucioni i Prefektit ka hartuar gjithashtu Planin e Masave për administrimin e sezonit turistik dimëror 2025-2026, duke përcaktuar detyrat konkrete të të gjitha institucioneve të ngarkuara dhe duke harmonizuar veprimet me Strategjinë Kombëtare të Turizmit.
Prefekti Jole theksoi se një sinergji efektive mes aktorëve të zinxhirit turistik në rajon do të kontribuonte në përmbushjen e objektivit të qeverisë, që Shqipëria të bëhet kampione e turizmit në Ballkan deri në vitin 2030.
✅ Qarku i Korçës ka të gjitha potencialet për të ofruar turizëm gjithëvjetor, me atraksione natyrore, historike e kulturore, kulinari tradicionale unike dhe shërbime cilësore në përputhje me standardet më të kërkuara.
