Një ngjarje e rëndë ka tronditur kolegët e Policisë së Burgjeve në Korçë. Inspektori Xhevahir Mullaj, gjatë kryerjes së detyrës në sektorin e kontrollit pranë IEVP Korçë, ka pësuar një problem të rëndë shëndetësor dhe ndodhet aktualisht në reanimacionin e Spitalit Rajonal të Korçës, në gjendje shumë kritike për jetën.
Pavarësisht ndihmës së parë të dhënë nga sektori i shëndetësisë pranë institucionit ku ai shërben, gjendja e tij nuk është përmirësuar, ndërsa mjekët raportojnë se situata mbetet tepër e rënduar.
Xhevahir Mullaj njihet nga kolegët si një punonjës i ndershëm dhe përkushtuar, si dhe një prind shembullor, i cili po rrit i vetëm fëmijët e tij pas humbjes së bashkëshortes disa vite më parë. Sot, ai ka nevojë për mbështetjen e të gjithëve — kolegëve, institucioneve shtetërore, pushtetit lokal dhe organizatave fetare e bamirëse — për ta ndihmuar në këtë moment jetik.
Sindikata e Policisë së Burgjeve ka shprehur solidaritet të plotë me kolegun, duke kujtuar se i është gjendur pranë edhe më parë, në periudha të vështira të jetës së tij.
> “Do të jemi sërish pranë fëmijëve të tij me çdo mundësi që kemi, por kërkohet sensibilizimi i të gjithëve. Çdo kontribut i secilit prej nesh është i vyer për familjen e Xhevahirit,” – thuhet në njoftimin e sindikatës.
Sindikata gjithashtu apelon ndaj Qeverisë shqiptare që të mos vonojë miratimin e të drejtave social-ekonomike të parashikuara për punonjësit e sistemit të burgjeve, duke theksuar se puna në këtë sektor është tejet e vështirë dhe me rrezik të lartë për jetën dhe shëndetin.
Në fund, të gjithë kolegët dhe miqtë e Xhevahirit shprehin lutje dhe shpresë për shërimin e tij:
> “Bashkë ja dalim!”
