Sot shënohen 81 vite nga pushkatimi i Llazar Fundos (Zai), një prej figurave më të rëndësishme të mendimit politik dhe intelektual shqiptar. Me këtë rast, mbrëmjen e sotme në emisionin Opinion do të transmetohet një reportazh dhe intervista të realizuara në Ventotene, ishulli italian ku Fundo u burgos së bashku me patriotë, nacionalistë dhe antifashistë shqiptarë.
Në këtë udhëtim morën pjesë gazetari Blendi Fevziu, Indrit Hoxha dhe stafi i Opinion, si edhe skulptori i njohur Adi Dule, i cili ka përfunduar një bust dedikuar Zait. Kjo vepër arti pritet të vendoset në qytetin e Korçës, nën kujdesin e kryeministrit Edi Rama.
Udhëtimi në Ventotene u realizua në qershor, ku krahas Fevziut dhe ekipit të tij, morën pjesë ish-ministri i Mbrojtjes Niko Peleshi, skulptori Adi Dule dhe Fatjon Hajdini. Ishte pikërisht në këtë ishull ku Llazar Fundo kaloi katër vite të jetës së tij dhe ku, së bashku me intelektualë të tjerë europianë, hodhën themelet e Europës së pas Luftës së Dytë Botërore, thotë nipi i tij Elvi Fundo
Kujtimi i Fundos, 81 vite pas pushkatimit, mbetet një simbol i qëndresës dhe i vizionit për një Shqipëri e Europë të bashkuar.
