Më shumë se 30 vizita në ditë po kryhen në sanatoriumin e Korçës nga pacientë që paraqiten me temperaturë të lartë dhe të zgjatur. Lajmin e ka bërë me dije shefja e shërbimit të sanatoriumit, Diana Alickolli, e cila ka konfirmuar se bëhet fjalë për një virozë shumë ngjitëse.
Sipas Alickollit, situata e krijuar lidhet me ardhjen e emigrantëve gjatë kësaj periudhe vere, duke shtuar ndjeshëm numrin e rasteve.
“Po shohim mbi 30 vizita në ditë me pacientë që shfaqin temperaturë të lartë dhe simptoma të rënda viroze. Kjo lidhet me ardhjen e emigrantëve në Korçë dhe përhapjen e infeksioneve virale”, – është shprehur mjekja.
Shefja e sanatoriumit u ka bërë thirrje qytetarëve që të tregohen të kujdesshëm dhe të shmangin kontaktet e afërta, në mënyrë që viroza të mos përhapet më tej.
“Pacientët me temperaturë të lartë nuk duhet të kenë kontakte me të tjerët, pasi është një virozë shumë ngjitëse”, – theksoi ajo.
Ndërkohë, nga shërbimi i pneumo-ftiziatrisë në Korçë janë marrë edhe mostra për COVID-19, por tamponët kanë rezultuar negativë.
Kjo ka përjashtuar një rikthim të koronavirusit, duke konfirmuar se bëhet fjalë vetëm për një virozë të përhapur gjatë kësaj periudhe.
