Pika e kalimit kufitar në Qafë Thanë, përgjatë sezonit turistik, përballet me fluks mjaft të lartë hyrje-daljesh, kryesisht nga turistët e huaj.
Për pasojë, gjatë kësaj periudhe, kjo pikë kalimi kufitar shënon edhe radhë të gjata, të cilat ditëve të fundit kanë arritur edhe në kilometrike, kryesisht në dalje drejt Maqedonisë së Veriut.
Kalimtarët janë të detyruar të presin kryesisht nga 1 deri në 3 orë, sidomos gjatë fundjavave, kohë kur fluksi i lëvizjes është mjaft i lartë.
Shkak për situata të tilla bëhet gjithmonë pala maqedonase, e cila punon me pak sportele, ndërsa nuk pranon të procesojë me formën e përshpejtuar, e cila është e lejueshme dhe pranueshme në rastet e radhëve kilometrike.
Qytetarët shprehen të indinjuar, ndërsa kërkojnë zgjidhje, pasi edhe pse midis palëve të kontrollit kufitar ka një njëhsim të ambienteve të qëndrimit, kontrolli i dokumenteve është po i njëjti. Kjo, pasi të dyja palët punojnë me sisteme të ndryshme.
Mesatarisht, përgjatë sezonit veror, në këtë pikë kalimi kufitar hyjnë dhe dalin mbi 10 mijë shtetas çdo 24 orë.
Situata më e rënduar duket në dalje të tokës nga Shqipëria sesa në hyrje, ndërsa e vetmja formë proteste e drejtuesve të mjeteve është rënia e borive për të “zgjuar” kontrollorët.
