Menjëherë pas publikimit të disa pamjeve, të publikuara në rrjetet sociale, në të cilat shfaqet momenti ku dy shtetas (burrë e grua) shfaqen në rrugë me një vajzë të mitur, ku dallohet qartë që burri e kap dhe e tërheq për flokësh vajzën e mitur, shërbimet e Komisariatit të Policisë Korçë kanë kryer veprimet procedurale dhe kanë bërë të mundur identifikimin dhe shoqërimin në komisariat të shtetasve të shfaqur në video. Nga deklarimet e dhëna para oficerëve të policisë gjyqësore rezultoi që shtetasi që kishte kapur prej flokësh vajzën e mitur ishte babai i vajzës.
Në përfundim të veprimeve u referuan materialet në Prokurori, ku nisi procedimi penal për shtetasin M. U., 33 vjeç, shtetas holandez, për veprën “Keqtrajtimi i të miturit”.
Drejtoria Vendore e Policisë Korçë falënderon median dhe qytetarët për denoncimin e rasteve të tilla, si dhe i fton të vijojnë t’i denoncojnë për çdo rast dhune që shohin, apo paligjshmërie.
• Specialistët e Sektorit të Qarkullimit Rrugor arrestuan në flagrancë shtetasin Sh. M., 36 vjeç, banues në Ersekë, pasi automjeti që drejtonte në gjendje të dehur ka humbur kontrollin mbi drejtimin e tij, dhe si pasojë automjeti ka dalë nga rruga, duke marrë dëmtime të lehta vetë 36-vjeçari dhe një shtetas tjetër, pasagjer në automjet.
Gjithashtu, referuan materialet në Prokurori, ku filloi procedimi penal për një 17-vjeçar, pasi u kap duke drejtuar automjetin pa leje drejtimi.
• Specialistët për Hetimin e Krimeve në Komisariatin e Policisë Korçë ndaluan me iniciativë shtetasit M. H., 20 vjeç, dhe një 17-vjeçar, si dhe referuan materialet në Prokurori për shtetasin A. K., 18 vjeç, të tre banues në Korçë, pasi dyshohet se këta shtetas, në bashkëpunim me njëri-tjetrin, kanë vjedhur një shumë lekësh nga minimarketi i një 64-vjeçari.
Gjithashtu, referuan materialet në Prokurori, ku filloi procedimi penal për shtetasin Xh. K., 40 vjeç, banues në fshatin Boboshticë, pasi dyshohet se ka vjedhur një pompë uji në biznesin e një 62-vjeçari.
• Specialistët për Hetimin e Krimeve në Komisariatin e Policisë Devoll referuan materialet në Prokurori, ku filloi procedimi penal për shtetasin M. L., 31 vjeç, banues në fshatin Menkulas, pasi gjatë kontrollit të ushtruar në automjetin e tij u gjet dhe u sekuestrua në cilësinë e provës materiale një mjet prerës (thikë).
Gjithashtu, referuan materialet në Prokurori dhe shpallën në kërkim shtetasin E. P., 46 vjeç, banues në Bitickë, pasi ka thyer masën e sigurisë “Arrest në shtëpi”, të caktuar nga Gjykata e Korçës.
• Specialistët për Hetimin e Krimeve në Komisariatin e Policisë Pogradec referuan materialet në Prokurori, ku filloi procedimi penal për shtetasit:
M. K., 47 vjeç, banues në fshatin Vërdovë, pasi dyshohet se ka kanosur me një mjet prerës (thikë) një 32-vjeçar, për motive të dobëta;
A. B. dhe K. A., pasi u kapën duke kryer punime ndërtimi pa leje;
A. T., 35 vjeç, banues në fshatin Rrëmej, pasi u kap duke transportuar 12 m³ lëndë drusore të prerë në mënyrë të paligjshme. Lënda drusore dhe mjeti u sekuestruan në cilësinë e provës materiale.
• Specialistët për Hetimin e Krimeve në Komisariatin e Policisë Kolonjë referuan materialet në Prokurori, ku filloi procedimi penal për shtetasit K. R., 33 vjeç, dhe S. C., 37 vjeç, banues në fshatin Starje, pasi dyshohet se kanë goditur njëri-tjetrin me grushta, për motive të dobëta. Gjithashtu, 37-vjeçari i ka kërkuar me vetëgjyqësi shtetasit K. R., shlyerjen e një dëmi të shkaktuar nga qentë e tij.
• Specialistët për Hetimin e Narkotikëve referuan materialet në Prokurori, ku filloi procedimi penal për shtetasin A. T., 20 vjeç, banues në Pogradec, pasi gjatë kontrollit fizik iu gjet dhe u sekuestrua një sasi lënde narkotike e dyshuar kanabis.
Materialet procedurale i kaluan Prokurorisë, për veprime të mëtejshme.
—
Korçë / Informacion paraprak
Rreth orës 23:30, në fshatin Polenë, është gjetur nga familjarët, në oborrin e banesës së tij, pa shenja jete dhe pa shenja dhune, shtetasi P. V., 68 vjeç.
Ky shtetas dyshohet të ketë ndërruar jetë për shkaqe natyrale.
Grupi hetimor po punon për zbardhjen e rrethanave të rastit.
