TIRANËZIMI I KORÇËS – Nga Lazjon Petri
E tha, e tha i ndjeri Maks Velo, që stadiumi Skënderbeu i Korçës përveç adrenalinës prej kompeticionit sportiv, gëzon edhe vlerën e të qenurit i shëlbyer e i përtërirë shpirtërisht, përmes pamjes së gjelbëruar të peizazhit që ti sheh nga tribuna. Që e shihje, se kjo gjë u përçudnua me Belvederen dhe që po cenohet e kërcënohet edhe sot, prej projektit betonizues rreth stadiumit që po merr shtat (projekti i stadiumit u prezantua e u përzgjodh në fushatën zgjedhore të 2023).
Z.Zeqo, z.Peleshi dhe z.Rama janë ndoshta perustia me ambicien për të pjekur këtë lakror, që stadiumi Skënderbeu të jetë veshka në mes të një dhjami me betonarmè; ku gjalpi bie erë Dukë e ksistra vjen në trajtat e z.Filo, ekzekutivit bashkiak dhe Këshillit Bashkiak të Korçës.
Filozofia e Qemal Stafës me kullë në mes të Tiranës, po hyn në lojë për Korçën me popullsi 10 fish më të vogël, pa asnjë studim se si do ndikojë kjo kërpudhëri në mes të qytetit, që edhe pa këtë kërpudhëri, sipërmarrjet private të qytetit, sot që flasim, më së shumti po lëngojnë e po presin turistin si ujin në shkretëtirë.
Korça mund ta kopjojë nga Tirana mosbërjen e konsultimeve as me pronarët, as me banorët; mund të kopjojë edhe mungesën e vizionit për të mos konsideruar vendodhje alternative të stadiumit të ri, duke mosrespektuar thelbin e traditës, për ta shkelur me këmbë mundësinë e restaurimit ashtu siç është të të vjetrit; mund të kopjojë edhe gjetjet financiare të shekullit të XXI që kryeqyteti i ka me pash, por Korçës që meriton transparencë e dinjitet, e që ka për ADN filantropinë, nuk mund t’i mohohet ta gjejë vetë edhe pa ngut mbështetjen e nevojshme financiare, për të cilën Fondi Shqiptar i Zhvillimit thotë se e ka të pamjaftueshme, ndaj edhe po ppp-ohet, që të çash ferrat të gjesh stadiumin.
E the o Maksi e the, po kujt ja the!
L.p 21/07/2025
