Një vit më parë, Bashkia Korçë tenderoi për rreth 100 milion lekë të vjetra vijëzimin e rrugëve të qytetit. Fituese e këtij tenderi u shpall kompania IDK Konstruksion, në pronësi të biznesmenit të njohur Gramos Dalipi, i njohur për flamujt e kuq në sistemin e prokurimeve publike. Tenderi në fjalë është konsideruar me probleme që në nisje, për mënyrën si u zhvillua dhe mungesën e konkurrencës reale.
Sot, pas më pak se një viti, gjendja e vijëzimit në rrugët e Korçës është thuajse skandaloze. Vijat e bardha janë zhdukur, sikur të ishin vizatuar me bojë uji dhe jo me materialet e duhura për sinjalistikën rrugore. Unaza e qytetit, një nga akset më të rëndësishme, është lënë në harresë, ndërsa në lagjen 18 vijëzimet janë zhdukur krejtësisht.
Këshilltari i opozitës në Këshillin Bashkiak, Klajdi Pllaha, e ka denoncuar publikisht këtë situatë duke vënë në dukje se punët e kryera janë të cilësisë së dobët dhe afatshkurtra. Ai rikujton se këtë shërbim mund ta kishte kryer fare mirë Ndërmarrja e Shërbimeve Publike (NShP), duke ulur kostot dhe duke garantuar më shumë cilësi e kontroll.
Në vend që të nxirren mësime nga kjo eksperiencë e dështuar, Bashkia Korçë ka parashikuar në buxhetin e vitit 2025 edhe 200 milion lekë të tjera të vjetra për vijëzimin e rrugëve. Ende nuk dihet nëse këto para do përdoren për rrugë të reja apo për të njëjtat segmente ku boja është zhdukur tashmë. Por një gjë është e qartë: nëse puna do të bëhet me të njëjtin standard si një vit më parë, qyteti rrezikon të hyjë në një cikël tenderësh të pafund për të njëjtat punë, me taksapaguesit që paguajnë gjithmonë faturën.
Nëse vijëzimi i rrugëve është kthyer në një biznes që përsëritet çdo vit, kjo nuk është administrim, por abuzim me paratë publike.
