Çmimi i grurit në bashkinë e Maliqit ka pësuar një rritje këtë vit, krahasuar me sezonin e kaluar. Sipas të dhënave nga Drejtoria e Bujqësisë në bashkinë Maliq, fermerët po e shesin grurin direkt nga fusha me çmime që variojnë nga 28 deri në 30 lekë për kilogram, ndërkohë që një vit më parë çmimi ishte rreth 25 lekë/kg.
Rritja e çmimit ka ardhur si pasojë e kërkesës në treg dhe kostove në rritje, por gjithashtu edhe nga përmirësimi i cilësisë së prodhimit në disa zona të fushës së Maliqit.
Ndërkohë, fermerët që nuk kanë mundësi magazinimi po detyrohen të shesin prodhimin direkt nga fusha, shpeshherë me çmimin më të ulët të mundshëm. Fermerët që disponojnë magazina apo kapanone, nga ana tjetër, po zgjedhin ta ruajnë grurin me shpresën për një çmim më të lartë në javët apo muajt në vijim.
Zyrtarët lokalë të bujqësisë theksojnë se vlerësimi i saktë i çmimit përfundimtar do të bëhet në fund të sezonit, por tendenca aktuale është në favor të fermerëve.
