Gjashtë muaj nga ndarja e tij nga jeta, miqtë kujtojnë intelektualin e spikatur në fushën e shkencës, letërsisë dhe kulturës shqiptare, pogradecarin e mirë Kopi Kyçyku. Akademiku që mbante titullin “Qytetar Nderi” i qarkut të Korçës, mbylli sytë përgjithmonë në 30 Dhjetor 2024.
Ai ka lënë pas një trashëgimi të pasur dhe të pavdekshme intelektuale, për të cilën është kujtuar dhe do të kujtohet gjithmonë. Kopi Kyçyku ka lindur më 30 qershor 1943 në Pogradec dhe studimet e para i mori në vendlindje. Më pas, kreu në Fakultetin e Gjeologji-Minierave, në Universitetin e Tiranës.
Në karrierën e tij të pasur ka mbajtur funksione të ndryshme në administratën lokale, radiotelevizion, Ministrinë e Punëve të Jashtme dhe Akademinë e Shkencave të Shqipërisë.
Ai është autor i shumë veprave poetike, satirike, monografish historike dhe esesh. Gjithashtu, ka përkthyer një numër të konsiderueshëm veprash të rëndësishme të letërsisë dhe kulturës botërore, duke pasuruar kulturën shqiptare me përkthime të vyera.
Puna e tij nuk është kufizuar vetëm në Shqipëri, pasi ishte anëtar i disa organizatave shkencore ndërkombëtare. Që nga viti 1998, Kopi Kyçyku ishte bashkëthemelues dhe bashkëdrejtues i Revistës Evropiane “Haemus” si dhe Kryetar i Shoqatës Kulturore Shqiptare me të njëjtin emër.
Për kontributin e tij të spikatur, në vitin 2019, Këshilli i Qarkut Korçë e nderoi me titullin e lartë “Nderi i Qarkut”.
