Punimet për ndërtimin e Korridorit VIII vijojnë me intensitet të lartë edhe gjatë fundjavës, siç konfirmon zëvendëskryeministrja dhe ministrja e Infrastrukturës dhe Energjisë, Belinda Balluku. Përmes një postimi në rrjete sociale, Balluku ka bërë të ditur se në lotin 7 të aksit Elbasan – Qafë Thanë, nuk ka vend për ndërprerje, pasi kantieret e infrastrukturës vazhdojnë punën me ritme të shpejta.
Aktualisht, po punohet për ndërtimin e veprave të artit, duke përfshirë bokse teknike dhe nënkalime, që do të garantojnë një infrastrukturë moderne dhe të sigurt për lëvizjen e mjeteve dhe qytetarëve në këtë segment të rëndësishëm rrugor.
Ky segment është pjesë kyçe e Korridorit VIII, një projekt strategjik që synon të lidhë brigjet e Adriatikut me ato të Detit të Zi, duke përmirësuar ndjeshëm qarkullimin dhe zhvillimin ekonomik të rajonit.
Autoritetet kanë theksuar se projekti po ecën sipas planit, ndërsa inxhinierët dhe punonjësit e terrenit janë të angazhuar maksimalisht për të përmbushur standardet e kërkuara dhe afatet e përcaktuara.
