Në Ditën Ndërkombëtare të Fëmijëve, 1 Qershorin, një familje nga një zonë e thellë malore, në Këmbëthekër të bashkisë Maliq, mori një dhuratë me kuptim të thellë dhe ndikim të menjëhershëm në jetesën e tyre të përditshme.
Genci, baba i katër fëmijëve, është përballur çdo ditë me sfida të mëdha për t’i çuar të vegjlit në shkollë. Prej vitesh, ai përdorte Tomin, kalin e shtëpisë, për të përshkuar një rrugë prej rreth 1 ore, në çdo mot – shi, borë apo vapë.
Ky realitet prekës është sjellë më herët në vëmendje nga portali bufiurte.al, përmes një raportimi të gazetarit Xhensil Shkëmbi, i cili ngriti shqetësimin për kushtet e vështira në të cilat jeton kjo familje dhe sakrificat e përditshme të Gencit për shkollimin e fëmijëve.
Reagimi nuk vonoi: Arbër Hajdari dhe nisma “Fundjavë Ndryshe” u përfshinë menjëherë, dhe së bashku me mbështetjen e Ardit Gjebreas, bënë të mundur që sot familja e Gencit të ketë një makinë që do t’ua lehtësojë rrugën drejt dijes dhe jetën e përditshme.
“Një ndryshim i thjeshtë, por me shumë kuptim”, siç u tha në këtë ditë të veçantë, ku fëmijët duhet të ndihen më të vlerësuar dhe më të përkrahur se kurrë.
