17 fëmijë të një kopshti shtetëror në Gramsh janë helmuar si pasojë e konsumimit të vezëve të kontaminuara me salmonelë. Nga analizat e kryera nga Autoriteti Kombëtar i Ushqimit (AKU), vezët kishin origjinën nga kompania “Xhenis Sh” sh.p.k., me seli në Shkodër.
Kjo kompani është në pronësi të Belma Çelës, bashkëshortja e deputetit Agron Çela, i zgjedhur fillimisht me LSI-në dhe aktualisht pjesë e Partisë Socialiste. Kompania ka qenë më parë në emër të vetë Çelës, por në vitin 2013 aksionet iu kaluan bashkëshortes së tij.
AKU konfirmoi se nga mostrat e marra, të gjitha rezultuan pozitive për prani të salmonelës. Ndërkohë, kompania që furnizon me ushqime kopshtet e Gramshit, përfshirë dhe atë ku ndodhi helmimi, është “Nelsa sh.p.k.” – me një të shkuar të dokumentuar në tenderë publikë.
Familjarët e fëmijëve kanë protestuar duke kërkuar përgjegjësi dhe siguri ushqimore në institucionet arsimore.
