Një aksident rrugor është regjistruar ditën e sotme në aksin nacional Korçë–Pogradec, ku një kamion ka përplasur një të moshuar që po lëvizte në këmbë. Policia bën me dije se drejtuesi i mjetit, shtetasi Fidel Pinderi, 63 vjeç, banues në Korçë, është arrestuar në flagrancë për veprën penale “Shkelja e rregullave të qarkullimit rrugor”.
Ngjarja ka ndodhur gjatë paradites, ku sipas hetimeve paraprake, 63-vjeçari, teksa po drejtonte një kamion, ka goditur shtetasin I. H., 79 vjeç, këmbësor. I moshuari është dërguar menjëherë në spital dhe ndodhet jashtë rrezikut për jetën, ndërsa vijon të marrë ndihmën mjekësore.
Policia ka shoqëruar drejtuesin e kamionit dhe ka nisur hetimet për zbardhjen e plotë të rrethanave të aksidentit. Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë.
