Një festë e fjalës artistike me pjesëmarrje nga vendi dhe bota
Në datat 24 dhe 25 maj 2025, qyteti i Korçës bëhet sërish epiqendra e poezisë me Edicionin e 29-të të Festivalit Ndërkombëtar “Netët Korçare të Poezisë”, një nga ngjarjet më të rëndësishme kulturore në kalendarin letrar shqiptar.
Ky festival, që prej gati tre dekadash, mbledh në Korçë poetë të njohur nga Shqipëria dhe vende të ndryshme të botës, duke e kthyer qytetin juglindor në një vatër të gjallë të letërsisë dhe artit.
Programi i festivalit përfshin:
• Të shtunën, më 24 maj, ora 19:00, në ambientet e MIK (ish-materniteti) në Korçë, do të mbahet ceremonia solemne e hapjes, ku poetët pjesëmarrës do të prezantojnë krijimtarinë e tyre.
• Të dielën, më 25 maj, ora 19:30, po në të njëjtën hapësirë, do të zhvillohet Ora e Madhe Letraro-Artistike, me interpretimet artistike nga aktorët e Teatrit “Andon Z. Çajupi”, si dhe ceremonia e ndarjes së çmimeve letrare.
Ky aktivitet organizohet nga Bashkia Korçë, në bashkëpunim me Bibliotekën “Thimi Mitko” dhe Qendrën e Artit dhe Kulturës, si pjesë e angazhimit të vazhdueshëm për të promovuar dhe mbështetur krijimtarinë artistike në të gjitha format e saj.
Korça është dhe do të mbetet një vatër e gjallë e kulturës dhe artit. Të gjithë dashamirësit e letërsisë janë të ftuar të marrin pjesë dhe të ndajnë së bashku magjinë e poezisë.
