Pretendimet për një lidhje familjare mes ministrit të Mbrojtjes, Pirro Vengu, dhe zëvendësministrit Andrea Shllaku rezultojnë të pavërteta, sipas verifikimeve të kryera nga burime zyrtare dhe konfirmimeve të pavarura.
Debati nisi pas një deklarate të publikuar në rrjetet sociale nga ish-deputeti i Partisë Demokratike, Xhemal Gjunkshi, si dhe raportimeve në disa portale, ku pretendohej se dy zyrtarët janë “djem teze”. Në deklaratë, kjo lidhje e pretenduar u cilësua si një rast i “kapjes familjare të sigurisë kombëtare”.
Megjithatë, sipas verifikimeve, mes Vengut dhe Shllakut nuk ekziston asnjë lidhje farefisnie. Madje, sipas burimeve të cituara, ministri Vengu nuk ka teze.
Ndërkohë, burime pranë institucioneve shtetërore bëjnë me dije se emërimi i Andrea Shllakut është kryer në përputhje me procedurat ligjore. Sipas tyre, nuk ka dokumente apo fakte zyrtare që mbështesin pretendimet për nepotizëm apo shkelje të protokolleve të NATO-s.
Po ashtu, burime pranë Ministrisë së Mbrojtjes konfirmojnë se asnjë institucion ndërkombëtar, përfshirë NATO-n, EUROPOL-in apo FBI-në, nuk ka ngritur shqetësime lidhur me këto emërime.
Rasti rikthen në vëmendje rëndësinë e verifikimit të informacionit përpara publikimit dhe shpërndarjes së tij, veçanërisht kur bëhet fjalë për çështje që lidhen me sigurinë kombëtare dhe institucionet shtetërore.
