Zëvendësministrja e Brendshme, Silva Caka, ka komentuar në Korçë reagimin e Policisë së Shtetit gjatë protestave të fundit, duke bërë të ditur se 7 efektivë janë pezulluar nga detyra dhe po hetohen nga Agjencia e Mbikëqyrjes Policore.
Sipas Cakës, deri në momentin e deklaratës janë depozituar 55 ankesa nga qytetarë që pretendojnë se punonjësit e policisë kanë tejkaluar kompetencat. Ajo theksoi se të gjitha ankesat do të shqyrtohen, ndërsa pranoi se gjatë protestave ka pasur raste kur policia nuk ka reaguar, raste të ndërhyrjeve proporcionale, por edhe situata kur ka tejkaluar kompetencat.
E pyetur edhe për publikimin nga kryeministri të të dhënave të personave të përfshirë në protesta, Caka u shpreh se është e rëndësishme që të rinjtë dhe të miturit të ndërgjegjësohen për personat me të cilët përfshihen në tubime, duke paralajmëruar për rrezikun e përfshirjes në akte dhune dhe pasojat ligjore.
Zëvendësministrja theksoi se edhe personat me precedentë penalë kanë të drejtë të protestojnë, por kjo nuk u jep të drejtën të përdorin dhunë. Ajo nënvizoi gjithashtu rëndësinë e vetëkorrigjimit të policisë dhe respektimit të detyrës së saj.
Deklaratat u bënë në Korçë, ku Silva Caka ishte e pranishme në një takim që kishte në fokus parandalimin e trafikimit të fëmijëve.
