Qyteti antik i Nikajës, shtëpitë historike, vaji i ullirit dhe traditat vendase në qendër të një aktiviteti që synon të promovojë Mallakastrën si destinacion turistik.
Historia, trashëgimia kulturore dhe shijet tradicionale u bashkuan në Klos, në Bashkinë Mallakastër, përmes aktivitetit “Hidden Mallakaster”, një nismë që solli në vëmendje pasuritë më pak të njohura të kësaj treve dhe potencialin e saj për zhvillimin e turizmit të qëndrueshëm.
Aktiviteti u organizua nga ART-ER në bashkëpunim me Bashkinë Mallakastër, në kuadër të projektit BYLIS, duke u ofruar vizitorëve një përvojë që ndërthur historinë e lashtë, arkitekturën tradicionale, prodhimet vendase dhe muzikën.
Një nga ndalesat kryesore ishte qyteti antik i Nikajës, ku vizitorët u njohën me vlerat arkeologjike të këtij siti përmes një vizite të udhëhequr nga guida lokale. Krahas Bylisit, një prej monumenteve më të njohura të zonës, Nikaja përfaqëson një tjetër pasuri historike që synohet të bëhet pjesë e itinerareve turistike të Mallakastrës.
Vëmendje iu kushtua edhe shtëpive të vjetra të Klosit, të cilat ruajnë gjurmë të arkitekturës dhe mënyrës tradicionale të jetesës. Vizitorët patën mundësinë të njiheshin me prodhuesit vendas, produktet artizanale dhe shijen e vajit të ullirit të Mallakastrës, një prej produkteve karakteristike të kësaj treve.
Pasditja u përmbyll me një aperitiv dhe koncert me muzikë live, duke sjellë në një atmosferë festive banorët, vizitorët dhe përfaqësuesit e nismave lokale.
Operatorët turistikë njihen me potencialin e Mallakastrës
Në kuadër të aktivitetit u zhvillua edhe një udhëtim njohës për përfaqësues të agjencive dhe operatorëve turistikë shqiptarë. Gjatë vizitave, ata u njohën me parkun arkeologjik të Bylisit, pika të tjera me interes në territorin e Mallakastrës dhe ofertat e bujtinave të përfshira në projekt.
Synimi është që pasuritë historike, natyrore dhe kulturore të zonës të shndërrohen në paketa konkrete turistike, duke krijuar më shumë mundësi për bizneset vendase dhe për komunitetin.
Projekti BYLIS synon të rrisë dukshmërinë e Mallakastrës si destinacion turistik, të mbështesë guidat dhe sipërmarrjet lokale dhe të lidhë trashëgiminë kulturore me zhvillimin ekonomik.
Përmes “Hidden Mallakaster”, Klosi dhe Mallakastra prezantuan një tjetër anë të Shqipërisë, atë të pasurive që qëndrojnë larg itinerareve të zakonshme, por që mund të kthehen në pika tërheqëse për vizitorët vendas dhe të huaj.
