Zgjedhjet për kryesinë e Organizatës së Menaxhimit të Peshkimit në Pogradec janë shoqëruar me debate të ashpra mes peshkatarëve, ndërsa gjatë procesit është regjistruar edhe një përplasje fizike.
Një pjesë e peshkatarëve kanë kundërshtuar mënyrën e zhvillimit të zgjedhjeve, duke pretenduar se nuk janë njoftuar për procesin dhe se ai nuk është i ligjshëm. Ata kërkojnë anulimin e zgjedhjeve dhe një afat të ri për paraqitjen e kandidatëve.
Peshkatarët kundërshtues kanë ngritur gjithashtu akuza për favorizim të drejtimit aktual të organizatës dhe për probleme në mënyrën e ushtrimit të kompetencave.
Nga ana tjetër, ish-kryetari i Organizatës së Menaxhimit të Peshkimit, Adriatik Dokollari, i ka cilësuar zgjedhjet të rregullta. Sipas tij, pjesa më e madhe e anëtarëve janë të pranishëm dhe procesi po monitorohet nga përfaqësues të Ministrisë së Bujqësisë.
Organizata e Menaxhimit të Peshkimit ka një rol të rëndësishëm për komunitetin e peshkatarëve në Pogradec, pasi është e përfshirë në menaxhimin dhe kontrollin e aktivitetit të peshkimit, si edhe në zbatimin e projekteve dhe investimeve në këtë sektor.
