Mes gumëzhitjes së një qyteti që merr frymë dhe lëviz, në një mbrëmje, në studion mikpritëse të artistit Helidon Haliti, një tjetër hap merr hovin. Bienalja Ndërkombëtare e Karikaturës “Niko Nikolla” mblodhi jurinë në edicionin e katërt të saj.
Dy janë temat e këtij edicioni, “Engjëll apo Djall?” dhe “Portret – Bujar Kapexhiu”, ku takohen qindra mendime, këndvështrime dhe histori.
Bienalja Ndërkombëtare e Karikaturës “Niko Nikolla” themelon Çmimin “Zef Bumçi”, një vlerësim i ri për një nga figurat themeluese dhe baballarët e karikaturës shqiptare.
Ideatorja dhe drejtuesja Flora Nikolla flet për risitë dhe traditën e kësaj bienale.
“Përgjigja e botës si gjithmonë ndaj kësaj bienale ishte më tejet se pozitive dhe konkluzioni është që këta muaj që ne kemi kaluar konkluduan me 53 shtete të planetit tokë që marrin pjesë”, tha ajo.
Drejtori Artistik i bienales, i ardhur enkas nga Italia, karikaturisti me famë ndërkombëtare, Agim Sulaj vlerëson ecurinë e këtij eventi.
“Një moment i bukur jo vetëm për krijuesit që marrin pjesë, por dhe për Shqipërinë dhe për vendin, sepse ka qenë shumë e dashur dhe e lidhur me karikaturën Shqipëria, Tirana nëpërmjet revistës së Ostenit”, tha ai.
Për artisin e njohur Bujar Kapexhiu qasja ndryshe kësaj here, si subjekt i veprave e bën edhe më detajist në vlerësimin e artistëve.
“Do të jetë një kënaqësi sepse unë do të qesh me vetveten. Pra do të qesh me atë punë që kanë bërë karikaturistët të cilët më kanë parë mua në një formë të caktuar dhe ky është kurioziteti”, tha Kapexhiu.
Këto janë një pjesë e punëve, ku në mesin e 740 të tillave të ardhura nga artistë nga e gjithë bota juria lokale përzgjodhi 500 prej tyre, të cilat tashmë do t’i dorëzohen Jurisë Qendrore Ndërkombëtare.
Stacioni i radhës së Bienales së karikaturës do të mbaj mbërthyer publikun korçar, por jo vetëm artistë nga e gjithë bota, nga datat 31 tetor deri më 1 nëntor.
