Policia e Kolonjës ka finalizuar operacionin e koduar “Partners”, pas disa javësh hetimesh me metoda proaktive, për goditjen e veprimtarive kriminale në fushën e narkotikëve.
Në kuadër të operacionit janë arrestuar në flagrancë dy bashkëshortë, të dyshuar për kultivimin e 270 bimëve të dyshuara narkotike Cannabis Sativa.
Në pranga kanë rënë shtetasit Ladi Vasili, 64 vjeç, dhe Anila Vasili, 54 vjeçe, banues në fshatin Gjirakare.
Sipas Policisë, nga hetimet dyshohet se dy bashkëshortët kishin kultivuar 270 bimë narkotike në një zonë të pyllëzuar pranë banesës së tyre. Bimët u asgjësuan me anë të djegies.
Gjatë kontrollit të banesës, shërbimet e Policisë gjetën dhe sekuestruan në cilësinë e provës materiale dy thasë me lëndë të dyshuar narkotike Cannabis Sativa, në formën e bimëve të prera dhe në proces tharjeje.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
