Prej 28 vitesh, Klement Vesho nga Pogradeci ia ka kushtuar jetën pëllumbave të garës. Një pasion që nisi pas viteve të para të demokracisë dhe që me kalimin e kohës u kthye në një mënyrë jetese.
Çdo mëngjes, para çdo angazhimi tjetër, Klementi nis ditën duke u kujdesur për pëllumbat e tij. Për këtë pasion ai thotë se ka hequr dorë edhe nga zakone të tjera, duke vendosur që paratë dhe kohën që shpenzonte në aktivitete të tjera t’ia kushtonte pëllumbave. Ai e përshkruan këtë pasion si “adrenalinën” e tij.
Nga garat e para me qytetarët e Pogradecit, Klementi kaloi më pas në garat e organizuara nga federata. Ndër vite ka fituar dhjetëra kupa, ndërsa një prej rezultateve që veçon është ai i një pëllumbi që ka përshkuar rreth 1,500 kilometra nga Berlini në Pogradec, në vijë ajrore. Sipas tij, pëllumbi mbërriti në Pogradec dy ditë përpara të tjerëve dhe ishte i pari në Shqipëri.
Por ky pasion ka edhe koston e tij. Ushqimi, vitaminat dhe përgatitja për garat kërkojnë shpenzime të konsiderueshme. Sipas Klementit, vetëm shpenzimet për ushqime dhe vitamina mund të arrijnë në 2-3 mijë euro në vit. Ai tregon se vetëm një blerje e fundit për ushqime dhe vitamina i kushtoi rreth 700 euro.
Klementi shprehet gjithashtu se ky sport nuk merr mbështetje institucionale në Shqipëri, ndërsa sipas tij, në Maqedoninë e Veriut ofrohen lehtësime për ushqimin dhe vitaminat e pëllumbave të garës.
Pavarësisht kostove, për Klement Vesho pëllumbat mbeten pjesë e pandarë e jetës së tij. Pas 28 vitesh, ai vijon të kujdeset, të garojë dhe të presë me të njëjtin emocion kthimin e tyre në shtëpi.
