Në Korçë, një zanat i vjetër rrezikon të humbasë. Përpunimi i thupres, dikur një aktivitet i përhapur sidomos në komunitetin rom të qytetit, sot po mbijeton falë vetëm pak artizanëve.
Një prej tyre është Avni Kallo. Në moshën 7-vjeçare, ai mësoi zanatin nga gjyshi dhe babai. Sot, në moshën 71-vjeçare, vazhdon të punojë me duar, duke e kthyer thuprën në shporta dhe produkte të ndryshme.
Dikur në Korçë funksiononte edhe një repart i posaçëm për përpunimin e thupres, ku prodhoheshin artikuj të ndryshëm, një pjesë e të cilëve eksportohej. Por me kalimin e viteve, mungesa e tregut dhe emigracioni kanë bërë që numri i artizanëve të jetë gjithnjë e më i vogël.
Për Avniun, shqetësimi kryesor është e ardhmja e këtij zanati dhe mungesa e të rinjve që duan ta mësojnë.
Në duart e 71-vjeçarit, thupra vazhdon të marrë formë, ashtu siç ka ndodhur prej më shumë se gjashtë dekadash. Por bashkë me të, rrezikon të shuhet edhe një pjesë e traditës dhe historisë artizanale të Korçës.
