Krahina e njohur e Oparit në Korçë po përballet me një braktisje të vazhdueshme. Dikur kjo zonë numëronte mbi 6 mijë banorë, ndërsa sot në shumë prej fshatrave kanë mbetur vetëm pak familje.
Mbi 16 fshatra të zonës janë boshatisur, ndërsa banorët thonë se një nga arsyet kryesore të largimit është gjendja e rrugës. Sipas tyre, mungesa e infrastrukturës ka vështirësuar jetesën dhe ka penguar edhe zhvillimin e turizmit.
Në Opar ndodhet edhe Kisha e Shën Triadhës, e ndërtuar në vitin 1470 nga principata e Muzakajve, një monument me vlera të rëndësishme historike dhe kulturore. Megjithatë, banorët thonë se edhe për të mbërritur te ky destinacion rruga është një pengesë e madhe.
Ata kërkojnë ndërhyrje për rikonstruksionin e rrugës, duke shpresuar se një investim do të ndihmonte në rikthimin e banorëve të larguar dhe në zhvillimin e zonës.
“E vetmja zonë në Korçë që nuk ka asnjë metër asfalt. Dikur kishte 6 mijë banorë, sot më pak se 500. Po u bë asfalti, për një vit do të kthehen, duan të ndërtojnë shtëpitë.”
“Çfarë ka bërë Opari për Shqipërinë, nuk ka bërë shteti për Oparin. Njerëzit thonë nuk shkojmë dot se nuk ka rrugë.”
Banorët thonë se mungojnë edhe shërbimet bazë, ndërsa dimri e bën edhe më të vështirë jetesën për familjet që kanë zgjedhur të qëndrojnë.
“Rrugë s’ka, dimër, pleq. S’ka mjek, s’ka rrugë. E tërë zona pa një mjek, pa një rrugë. Nga Voskopojë deri këtu janë vetëm 9 kilometra.”
Opari rrezikon të mbetet jo vetëm pa banorë, por edhe pa një pjesë të rëndësishme të historisë dhe trashëgimisë së tij. Banorët kërkojnë që ndërhyrja të nisë sa më shpejt, përpara se fshatrat të boshatisen përfundimisht.
