Korçë – Fondi Shqiptar i Zhvillimit ka shpallur fitues konsorciumin e kompanive shqiptare “Ndertimi” dhe “Ndregjoni” për realizimin e punimeve që do të mundësojnë rihapjen e Liceut Francez në Korçë.
Kontrata, me vlerë rreth 522 milionë lekë, ose 5.7 milionë euro me TVSH, përfshin projektimin dhe realizimin e punimeve për rikonstruksionin e godinës ekzistuese, e cila aktualisht përdoret nga Universiteti i Korçës, si dhe ndërtimin e një godine të re dhe të një konvikti.
Sipas të dhënave të publikuara nga Fondi Shqiptar i Zhvillimit, punimet duhet të përfundojnë brenda 18 muajve nga nisja e zbatimit të kontratës.
Projekti pritet të kërkojë edhe një investim shtesë prej 1.7 deri në 2.3 milionë euro për pajisjet dhe mobilimin e ambienteve. Ndërkohë, kostot e funksionimit të shkollës gjatë pesë viteve të para parashikohet të mbulohen nga buxheti i shtetit, me një kosto rreth 2.15 milionë euro në vit. Franca do të kontribuojë me rreth 594 mijë euro gjatë kësaj periudhe për pagën e drejtorit të shkollës.
Bashkia e Korçës do të financojë veçmas kostot për konviktin dhe mensën.
Liceu Francez i Korçës është një institucion me rëndësi të veçantë historike për qytetin. Shkolla u themelua në vitin 1917 dhe u mbyll në vitin 1939, pas pushtimit italian. Rikthimi i saj synon të rivendosë funksionin e një prej institucioneve arsimore me traditë të gjatë në Korçë, përmes një infrastrukture të rikonstruktuar dhe ambienteve të reja.
Kontrata për rikonstruksionin dhe ndërtimin e objekteve të reja u fitua për një vlerë më të ulët se fondi i parashikuar fillimisht për tenderin.
