Universiteti “Fan S. Noli” në Korçë po zgjeron bashkëpunimin me universitetet e huaja përmes programeve të mobilitetit dhe diplomave të përbashkëta.
Këtë vit, në Korçë kanë ardhur 42 studentë të huaj, ndërsa 14 studentë shqiptarë kanë përfituar nga programet e mobilitetit për të studiuar jashtë vendit. Për akademikët, universiteti raporton 73 dalje dhe 56 hyrje.
Rektori i Universitetit “Fan S. Noli”, Lorenc Ekonomi, tha se procesi i ndërkombëtarizimit po vijon me marrëveshje të reja me universitete të huaja.
Një nga risitë është programi “Data Science”, i cili do të zhvillohet në dy gjuhë, shqip dhe anglisht. Programi është riorganizim i degës Matematikë-Informatikë dhe fokusohet te inteligjenca artificiale, kodimi dhe algoritmet.
Universiteti pritet të hapë gjithashtu një doktoraturë me diplomë të përbashkët me një universitet rumun, si dhe një master shkencor në Shkenca Kompjuterike, në bashkëpunim me Universitetin e Barit. Ndërkohë, vijon edhe programi bachelor me diplomë të dyfishtë me Universitetin Politeknik.
Sa i përket regjistrimeve, në fazën e parë janë regjistruar rreth 330 studentë. Programet më të kërkuara janë Infermieria, Sportet dhe Mamia, ndërsa interes ka edhe për Ekonomikun, Financën, Menaxhimin dhe degët digjitale.
Universiteti nuk parashikon hapjen e degëve të reja bachelor, por do të riorganizojë programet me më pak kërkesa, duke i përshtatur me nevojat e tregut të punës.
