3.4 milionë euro investim, fonde europiane dhe publike, punime që nisin, ndërpriten dhe tani… një projekt i ri që duhet të ndryshojë projektin e vjetër.
Kjo është historia e investimit për zhvillimin e turizmit në Dardhë, Arrëz, Sinicë dhe Nikolicë.
Në kuadër të tij ishte parashikuar edhe “Dardha Zipline”, me një vlerë prej rreth 580 mijë eurosh me TVSH.
Punimet nisën, por nuk shkuan larg. Tani janë ndërprerë dhe askush nuk mund të japë një datë se kur do të përfundojë Zipline.
Arsyeja?
Sepse në zonë është njoftuar një tjetër projekt turistik dhe tashmë duhet rishikuar projekti ekzistues.
Me pak fjalë, një projekt që kishte marrë fondet, kishte hyrë në zbatim dhe kishte një plan të përcaktuar, duhet të presë një projekt tjetër.
Dhe këtu historia bëhet edhe më interesante.
Fondi Shqiptar i Zhvillimit thotë se deri tani nuk ka paguar asnjë lek për kontraktorin e “Dardha Zipline”.
Por punimet kanë nisur.
Pra, kemi një projekt publik me vlerë qindra mijëra euro, ku puna nis, më pas ndërpritet dhe tani pritet të ndryshohet projekti, ndërsa kontraktori ende nuk është paguar.
Kush mban përgjegjësi për këtë situatë?
Kush e planifikoi investimin fillestar?
Kush e miratoi?
Pse nisi zbatimi nëse në të njëjtën zonë po planifikohej një tjetër ndërhyrje turistike?
Dhe sa do të kushtojë në fund kjo histori?
Sepse këtu nuk bëhet fjalë për një projekt privat që ndryshon sipas dëshirës së pronarit.
Bëhet fjalë për miliona euro investime publike dhe europiane.
Dhe ndërsa projektet rishikohen në zyra, Dardha vazhdon të presë investimet e premtuara në terren.
Zipline, që duhej të ishte një prej atraksioneve të reja turistike të zonës, sot është kthyer në një tjetër projekt që pret projektin e radhës për të ditur se si do të bëhet.
3.4 milionë euro në letër. Në terren, pritje.
