Me rastin e 109-vjetorit të shpalljes së Krahinës Autonome të Korçës, historiani Niko Kotherja ka çelur një ekspozitë të veçantë me 100 materiale historike, shumica prej të cilave ekspozohen për herë të parë për publikun. Dokumentet origjinale hedhin dritë mbi periudhën e krijimit të kësaj njësie administrative më 10 dhjetor 1916, jetën e saj juridike deri më 16 shkurt 1918, si dhe rolin e francezëve në rajon deri në mars të vitit 1920.
Niko Kotherja:
“Janë mbi 100 materiale, një pjesë e tyre për herë të parë vijnë në ekspozim dhe janë në origjinal. Tregojnë rrugëtimin e shqiptarëve dhe francezëve në atë që ndodhi në mesin e Luftës së Parë Botërore. Flasim për një njësi administrative shqiptare që u krijua më 10 Dhjetor 1916 dhe vijoi jetën e saj juridikisht deri më 16 Shkurt 1918. Flamuri shqiptar vijoi të jetë në Korçë deri në Mars 1920 me prezencën e francezëve. Bëhet fjalë për dokumente që trajtojnë historinë e formësimit të asaj që ndodhi këtu 109 vite më parë.”
Sipas historianit Kotherja, Korça e vitit 1916 funksiononte si një shtet më vete dhe në atë kohë, nga autoritetet franceze, njihej si kryeqyteti i Shqipërisë.
Niko Kotherja:
“Flasim për një shtet të vogël të asaj kohe, që pasqyrohet në një prej kartolinave të vitit 1918, ku një ushtar francez i dërgon familjes së tij kartolinë me pamje nga Korça dhe shkruan: ‘Korça, kryeqytet i Republikës Shqiptare’.”
Në kuadër të këtij përvjetori, Këshilli i Qarkut Korçë organizoi një sërë aktivitetesh festive dhe kulturore, ku më i veçanti u vlerësua parada e kostumografisë së qarkut, e cila solli në qendër trashëgiminë, traditat dhe identitetin kulturor të zonës.
