Situata e zjarrit që ka përfshirë kurorën e pyllit në fshatin Miras, Njësia Administrative Miras, Bashkia Devoll, paraqitet më e qetë këtë të premte, krahasuar me një ditë më parë. Ulja e temperaturave gjatë natës ka bërë që intensiteti i flakëve të bjerë, duke lehtësuar punën e forcave zjarrfikëse.
Rreth 100 efektivë të shërbimeve të bashkisë së Devollit dhe strukturave mbështetëse vijojnë të punojnë në terren, ku sipas burimeve zyrtare, përpjekjet janë përqendruar në krijimin e kanaleve izoluese me qëllim frenimin e përhapjes së vatrave të mbetura.
Ndërkohë, policia e komisariatit të Devollit ka proceduar penalisht një person, i dyshuar si autor i zjarrvënies së qëllimshme në zonë. Gjatë kontrollit në banesën e tij, uniformat blu gjetën rreth 4 metra sterë dru, çka ka forcuar dyshimet për prerje të paligjshme të pyjeve.
Hetimet për rastin vijojnë, ndërsa autoritetet lokale apelojnë për kujdes dhe përgjegjësi nga qytetarët, duke theksuar se çdo zjarr i vënë me qëllim jo vetëm dëmton ekosistemin, por rrezikon seriozisht edhe jetën dhe pronën e banorëve të zonës.
