Bashkia e Pogradecit ka shtuar kapacitetet e shërbimit zjarrfikës me një automjet të ri, dhuratë nga Bashkia e Wismarit në Gjermani, qytet me të cilin mban prej vitesh marrëdhënie binjakëzimi dhe bashkëpunimi.
Automjeti iu dorëzua kryetarit të Bashkisë Pogradec, Ilir Xhakolli, nga kryebashkiaku i Wismarit, Thomas Beyer, i shoqëruar nga kryetarja e Këshillit Bashkiak, Silvia Bratsch.
Gjatë ceremonisë, Thomas Beyer u shpreh se është kënaqësi që në emër të komunitetit të Wismarit t’i dhurojë Pogradecit një mjet që do të ndihmojë në rritjen e sigurisë dhe forcimin e kapaciteteve të shërbimit zjarrfikës.
Kryebashkiaku Ilir Xhakolli falënderoi autoritetet dhe qytetarët e Wismarit për mbështetjen e vazhdueshme, duke theksuar se kjo është zjarrfikësja e dytë që qyteti gjerman i dhuron Pogradecit. Ai u shpreh se shpreson që mjeti të përdoret sa më pak, si një dëshirë për sa më pak raste zjarresh, ndërsa vuri në dukje se përmasat e tij e bëjnë të përshtatshëm për ndërhyrje edhe në rrugicat e ngushta të qytetit.
Shefi i MZSH Pogradec, Armand Gora, e cilësoi automjetin një shtesë të rëndësishme për rritjen e efektivitetit të ndërhyrjeve në situata emergjente.
Kjo është zjarrfikësja e dytë që Wismari i dhuron Pogradecit, ndërsa bashkëpunimi mes dy qyteteve është zgjeruar ndër vite edhe në fusha të tjera, si shkëmbimet kulturore dhe aktivitetet për të rinjtë, duke forcuar më tej lidhjet e miqësisë mes dy komuniteteve.
