Detaje të reja janë zbardhur nga vrasja e 20-vjeçarit Johan Zuko, e ndodhur pasditen e sotme në lagjen nr. 14 në Korçë.
Sipas burimeve nga vendngjarja, viktima dhe autori i dyshuar janë përfshirë në një konflikt pak para momentit fatal. Një nga detajet që po verifikohet nga grupi hetimor është fakti se viktima dyshohet se kishte një thikë me vete, e cila është gjetur në dorën e tij pas ngjarjes.
Hetuesit po punojnë për të përcaktuar nëse thika është përdorur gjatë konfliktit dhe për të rindërtuar dinamikën e plotë të përplasjes mes dy të rinjve.
Sipas informacioneve paraprake, viktima dhe autori i dyshuar kanë qenë shokë dhe janë rritur së bashku. Ndërkohë, autori i dyshuar raportohet se ka precedentë penalë për armëmbajtje pa leje dhe plagosje.
Policia ka identifikuar autorin e dyshuar dhe vijon kontrollet për kapjen e tij. Në disa zona janë ngritur postblloqe, ndërsa po kontrollohen akset rrugore dhe zonat përreth Korçës.
Grupi hetimor po sekuestron gjithashtu pamjet e kamerave të sigurisë në zonën e ngjarjes, të cilat pritet të ndihmojnë në dokumentimin e lëvizjeve të viktimës dhe autorit, si dhe në zbardhjen e plotë të konfliktit që përfundoi në mënyrë tragjike.
