Fshati i Vërnikut në Devoll, vetëm pak minuta larg qytetit të Bilishtit, si shumica e fshatrave në këtë zonë është prekur ndjeshëm nga shpopullimi
Dyert janë të mbyllura, në rrugët me kalldrëm pak janë ata që shkelin ndërsa dritaret kanë vite që nuk hapen
Në fshat nuk ka shkollë, nuk ka qendër shëndetësore e as ujësjellës apo kanalizime të ujërave të zeza
Profesori Llazo Nestor tregon se vetëm 30 familje kanë mbetur në Vërnik, pasi shumica kanë emigruar. Një pjesë të fajit ja lë edhe mungesës së investimeve ndërsa të vetmit që janë kujtuar për ta, është Bullgaria
“në fshat kanë ngelur 30 familje, pjesa më e madhe është 1-2 pleq, kurse pjesa tjetër e banorëve është larguar në vende të ndryshme kryesisht Greqi, Itali, Gjermani. Në këto 30 vite të demokracisë i vetmi shtet që është kujdesur për banorët e këtij fshati është Bullgaria dhe këtu duhet përmendur 3 fakte. Dëshira për t’i pajisur me pasaporta bullgare, hapja e dyerve të universiteteve, asfaltimi rrugës Bilisht – Vërnik qe e bëri qeveria bullgare. Pika nevralgjike është uji dhe kanalizimet ”
Zhurma fëmijësh më nuk ka, ndërsa qeveria shqiptare nuk është kujtuar ndonjëherë për fshatin, thotë kryeplaku i Vërnikut
” as shkollë, as kopsht, nuk ka as fëmijë. Me I vogli është 40 vjeç këtu, njerëzit u detyruan e ikën Bilisht ose Greqi, po te kishte shkollë mund të kishte fëmijë. Dasma e fundit këtu 5-6 vite më parë, çifti jetonte në Greqi por kishte qejf ta bënte dasmën në fshat. Nuk kemi as sistem uji, as kanalizime, problemi kryesor është ujërat e zeza se janë me gropat septike. Qeveria shqiptare mos bëjë një gjë elementare. ”
Shumica e fshatrave të Devollit janë drejt boshatisjes ndërsa banorët e këtyre fshatrave theksin e vendosin tek mungesa e infrastrukturës, çka i çon te emigrojnë
