Një 49-vjeçar është arrestuar nga Policia e Korçës pasi dyshohet se ka tentuar të vjedhë një banesë në fshatin Goskovë, ndërkohë që ishte nën masën e sigurisë “Arrest në shtëpi”.
Sipas policisë, pas kallëzimit të bërë nga një banor për tentativën e vjedhjes në banesën e tij, shërbimet e Komisariatit të Policisë Korçë organizuan menjëherë punën për identifikimin dhe kapjen e autorit.
Si rezultat i veprimeve hetimore u bë i mundur arrestimi i shtetasit Genci Sanço 49 vjeç, banues në Goskovë. Gjatë verifikimeve rezultoi se ai ishte me masë sigurie “Arrest në shtëpi” për veprën penale “Drejtimi i automjetit në mënyrë të parregullt”, ndërsa dyshohet se ka drejtuar automjetin pa leje drejtimi.
Materialet procedurale i janë referuar Prokurorisë së Korçës për veprime të mëtejshme, për veprat penale “Vjedhja”, mbetur në tentativë, “Drejtimi i automjetit në mënyrë të parregullt” dhe “Largimi i të burgosurit nga vendi i qëndrimit”.
