Të premten, në orën 11:00, do të inagurohet zyrtarisht aksi rrugor Qukës-Qafë Plloçë, një ndër veprat më të rëndësishme infrastrukturore në juglindje të vendit.
Në ceremoni do të marrin pjesë Kryeministri Edi Rama dhe Ministrja e Infrastrukturës Belinda Balluku, përfshirë edhe zyrtarë lokalë nga Pogradeci, Korça, Maliqi etj
Ky aks rrugor i kategorisë C ka një gjatësi prej 43 kilometrash dhe tashmë është asfaltuar i gjithi. Punimet kanë zgjatur mbi 12 vite, kjo për shkak të vështirësive të projektit dhe terrenit të rrëshqitshëm, ndërsa kostoja e investimit, e mbuluar nga Banka Islamike, ka arritur në rreth 273 milionë euro.
Rruga pritet të shkurtojë ndjeshëm distancën nga juglindja drejt Tiranës dhe do të ketë ndikim të drejtpërdrejtë në zhvillimin e zonës së Mokrës, e cila historikisht ka qenë e izoluar dhe pa lidhje rrugore me standarde bashkëkohore.
Ky aks përshkon Mokrën e Poshtme dhe të Sipërme, duke ofruar akses më të lehtë drejt monumenteve të kulturës dhe natyrës si:
●Ura e Golikut e shekullit XVII
●Varret Ilire të Selcës mbi 2500 vjeçare
●Ura e Terziut
●Bishnica dhe liqenet akullnajore të Lukovës.
●Kalanë e Zëmçës
●Mullarët e Gurtë (Gurët e Nuses)
●Malin e Kozicit
●Shën Marenën etj
Gjithashtu, rruga kalon pranë fshatrave karakteristike si Zëmça, Pleshishti, Trebinja e Potkozhani, të njohura për shtëpitë prej guri dhe traditat e tyre.
Në përfundim të segmentit, udhëtarëve u shfaqet panorama e Pogradecit, liqenit dhe fushës së Starovës, duke e bërë këtë aks jo vetëm një investim strategjik për zhvillimin ekonomik e turistik, por edhe një urë të re lidhjeje mes komuniteteve.
