Është e shpeshtë kur dëgjon se një grup ndahet apo prishet për interesa apo fjalë. Aq më tepër kur bëhet fjalë për grupe muzikore, të cilat herë pas here shkrihen dhe rrallëherë rezistojnë gjatë. Por dy burra kanë ngelur bashkë prej shtatorit të vitit 2009 – Alban Plovishti dhe Mond Kërmezi.
Albanin dhe Mondin i sheh bashkë kudo: nëpër sebepe, në dasma, në udhëtime të pafundme. Ata janë kthyer në një dyshe të pandashme në skenë dhe në jetë. Jeta nganjëherë “të mbledh” për punë, e pastaj puna të bën vëlla – dhe ky është rasti i tyre.
Por miqësia dhe muzika e tyre nuk janë kufizuar vetëm në Shqipëri. Prej vitesh, ata kanë shkelur së bashku në skena të ndryshme në disa vende të Europës, në Amerikë dhe madje edhe në Australi, ku kanë kënduar për bashkatdhetarët dhe janë pritur me duartrokitje e dashuri. Emri i tyre është bërë sinonim i festës dhe atmosferës së mirë.
Alban Plovishti, këngëtari i njohur i muzikës popullore, tregon për Bufiurte.al se Mondin e njeh prej vitesh, pasi është nip nga Pojani. Nga ana tjetër, Mond Kërmezi shprehet mirënjohës për mikun e tij bulgarecear, me të cilin ndan mbi 16 vite punë, këngë dhe aventura.
Një miqësi e rrallë, një bashkëpunim që ka qëndruar mbi kohën dhe mbi sfidat. Dhe sigurisht, një shembull për shumë të tjerë në skenën muzikore shqiptare.
