Tiranë/Korçë – Gjykata e Apelit të Juridiksionit të Përgjithshëm në Tiranë ka vendosur sot (22 korrik 2025) rikthimin në detyrë të tre efektivëve të Policisë Kufitare të Kapshticës, të pezulluar pas operacionit antidrogë të zhvilluar më 7 qershor.
Bëhet fjalë për nënkomisarin Ylli Dushku, si dhe inspektorët Denion Myteberi dhe Lirim Hymetllari, të cilët u arrestuan nga Agjencia e Mbikëqyrjes Policore (AMP), nën dyshimin e “shpërdorimit të detyrës” në rastin e kapjes së 6 kilogramëve heroinë në Pikën Kufitare të Kapshticës.
Pak ditë pas arrestimit, Gjykata e Korçës e cilësoi të paligjshëm ndalimin e tyre, duke i liruar nga masa e arrestit. Megjithatë, pezullimi nga detyra mbeti në fuqi deri në këtë të martë, kur Apeli vendosi të rrëzojë edhe këtë masë, duke e cilësuar gjithashtu të paligjshme.
Dy gjykata japin të drejtë punonjësve të policisë
Vendimi i sotëm i Apelit e mbyll përfundimisht këtë kapitull për tre efektivët, të cilët gjatë gjithë kohës kanë deklaruar se nuk kanë patur asnjë lidhje me trafikun e drogës dhe se janë goditur padrejtësisht gjatë ushtrimit të detyrës.
Burime pranë avokatëve mbrojtës thanë se:
“Vendimi i Apelit është një konfirmim i asaj që ne kemi deklaruar që në fillim: arrestimi dhe pezullimi i tyre ishin të pabazuara në prova. Kjo është një fitore për drejtësinë dhe për të gjithë punonjësit që kryejnë detyrën me ndershmëri.”
Një rast që ngjalli debat dhe dyshime për tendencë
Ky rast ngjalli jo pak debat në radhët e Policisë së Shtetit dhe në opinionin publik, sidomos për mënyrën sesi ndërhyri Agjencia e Mbikëqyrjes Policore. Në kohën kur hetimet duhet të jenë të qeta, të bazuara në prova dhe të balancuara me dinjitetin e punonjësve të rendit, AMP preferoi të veprojë me bujë dhe shoqërime demonstrative.
Në fund, dy gjykata hodhën poshtë akuzat dhe masat ndaj policëve të Kapshticës, duke nxjerrë në pah një problem që po shfaqet shpesh: mbikëqyrja e policisë nuk mund të kthehet në persekutim të punonjësve të ndershëm të uniformës blu.
Organe si AMP duhet të jenë kujdestarë të ligjit, jo shkelës të tij. Arrestime pa prova dhe masa të nxituara rrezikojnë jo vetëm jetën profesionale të efektivëve, por edhe besimin te institucionet.
Shkrim nga Bufiurte.al
