Qeveria shqiptare do të mbështesë rreth 900 biznese të prodhimit të nënprodukteve ushqimore me origjinë shtazore, të cilat kanë potencial për eksport jo vetëm në vendet e rajonit, por edhe në Bashkimi Europian.
Këtë e bëri të ditur kryeinspektori i përgjithshëm Dashamir Sula, i cili theksoi se Shqipëria ende nuk është në nivelin e kërkuar për sigurinë ushqimore, sipas standardeve të Bashkimi Europian, pjesë e kapitullit 12 të negociatave. Megjithatë, ai nënvizoi se puna ka nisur me intensitet për të përmirësuar standardet dhe për të rritur cilësinë e produkteve.
Sipas Sulës, procesi i certifikimit është një detyrim që lidhet me hapjen e negociatave dhe përfshin asistencë për bizneset në mënyrë që të përmbushin çdo kërkesë të BE-së. Ai bëri me dije se janë ngritur grupe verifikimi që do të përzgjedhin subjektet përfituese, duke përfshirë baxhot dhe njësi të tjera të përpunimit ushqimor.
“Bëhet fjalë për produkte që nuk do të konsumohen vetëm në Shqipëri, por do të eksportohen në të gjitha vendet e BE-së. Standardet janë me tolerancë zero. Është një proces i vështirë që kërkon kohë, investime dhe përkushtim, ndaj qeveria ka vendosur të ofrojë lehtësira si grante dhe kredi të buta për këto biznese”, u shpreh ai.
Siguria ushqimore mbetet një nga sektorët më sfidues në kuadër të negociatave me Bashkimi Europian. Së fundmi, edhe kryeministri Edi Rama, së bashku me drejtues të institucioneve shtetërore, ka kërkuar rritje të vëmendjes dhe angazhimit për të përmbushur standardet e kërkuara nga BE në këtë fushë.
