Pika kufitare e Qafë Thanës pritet të funksionojë së shpejti me sistemin e kalimit me një ndalesë, një ndryshim që synon të eliminojë radhët e gjata dhe pritjet me orë të tëra për qytetarët dhe turistët që lëvizin mes Shqipërisë dhe Maqedonisë së Veriut.
Lajmi është bërë i ditur nga kryetari i Bashkisë së Pogradecit, Ilir Xhakolli, pas një takimi të zhvilluar në Qafë Thanë me zv.ministrin e Brendshëm të Maqedonisë së Veriut, Astrit Iseni, Prefekten e Qarkut Korçë, Florina Zegullaj dhe kryetarin e Komunës së Strugës, Mendi Qyra.
Sipas Xhakollit, në takim u diskutuan hapat konkretë për zbatimin e sistemit të kontrollit kufitar me një ndalesë, një proces që tashmë ka marrë miratimin nga pala maqedonase dhe pritet të ratifikohet edhe nga qeveria shqiptare për të nisur më pas zbatimin në terren.
Në pikën kufitare të Qafë Thanës regjistrohen rreth 1 milion hyrje-dalje vetëm gjatë tre muajve të sezonit veror, çka e bën të domosdoshme gjetjen e një zgjidhjeje për të reduktuar kohën e pritjes dhe për të përmirësuar lëvizjen ndërkufitare.
Kryebashkiaku i Pogradecit theksoi se bashkëpunimi me homologun e Strugës dhe institucionet e të dy vendeve ka bërë të mundur avancimin e procesit për njësimin e sistemit mes dy doganave, i cili pritet të finalizohet shumë shpejt.
Po ashtu, dy drejtuesit vendorë janë fokusuar edhe në përfundimin e procedurave për lëvizjen e njerëzve dhe mallrave përmes Liqenit të Ohrit, një projekt që konsiderohet me rëndësi për zhvillimin ekonomik dhe forcimin e bashkëpunimit mes Pogradecit dhe Strugës.
