Prefektura e Qarkut Korçë ka zhvilluar mbledhjen e Sekretariatit Teknik të Emergjencave Civile, me pjesëmarrjen e përgjegjësve të Emergjencave Civile, drejtuesve të shërbimeve zjarrfikëse të bashkive Korçë, Pogradec, Maliq, Devoll, Kolonjë dhe Pustec, si dhe përfaqësuesve të Policisë së Korçës, Administratës Rajonale të Zonave të Mbrojtura dhe OST Korçë.
Takimi u fokusua në masat për përballimin e situatave emergjente gjatë sezonit veror, në një periudhë të karakterizuar nga temperatura të larta dhe rritje e rrezikut për zjarre.
Gjatë mbledhjes u analizua situata e deritanishme në qark, ndërsa institucionet pjesëmarrëse raportuan mbi rastet e menaxhuara, problematikat e hasura dhe masat e marra për të përballuar çdo emergjencë të mundshme.
Në qendër të diskutimeve ishin rritja e gatishmërisë operacionale, forcimi i monitorimit të territorit, funksionimi i sistemit të sinjalizimit të hershëm, masat parandaluese ndaj zjarreve, garantimi i ndërhyrjeve të shpejta dhe koordinimi i vazhdueshëm mes institucioneve.
Në përfundim, u theksua rëndësia e bashkëpunimit ndërinstitucional dhe reagimit në kohë, me synimin për të mbrojtur jetën e qytetarëve, pronën dhe mjedisin. Prefektura e Qarkut Korçë bëri të ditur se do të vijojë monitorimin e situatës dhe koordinimin me të gjitha strukturat përgjegjëse për të garantuar gatishmëri të plotë gjatë gjithë sezonit veror.
