Pojani, një nga fshatrat më të njohur të Bashkisë së Maliqit me rreth 5000 banorë, vijon të ruajë një traditë të veçantë që e dallon nga zonat e tjera. Oborret e shtëpive janë të mbushura me trëndafila shumëngjyrësh, për të cilët gratë e fshatit kujdesen prej brezash.
Banorja Fehime Dervishi tregon se dashuria për lulet është pjesë e përditshmërisë së grave të Pojanit. Ajo kujdeset vazhdimisht për trëndafilat e oborrit të saj, ndërsa thekson se e njëjta traditë vazhdon edhe në familjet e tjera të fshatit.
Për të ruajtur dhe promovuar këtë identitet, çdo vit organizohet Festa e Trëndafilave, një aktivitet që mbledh qindra banorë dhe vizitorë. Kryetari i Bashkisë së Maliqit, Gëzim Topçiu, u shpreh se festa ka lindur si kërkesë e vetë komunitetit dhe tashmë është kthyer në një traditë të përvitshme.
Sipas tij, krahas potencialit bujqësor, Bashkia e Maliqit ofron edhe atraksione të rëndësishme turistike, me 16 monumente të kategorisë së parë dhe me zhvillimin e bujtinave në zonat e Gorës dhe Moglicës. Këto zona po tërheqin gjithnjë e më shumë vizitorë vendas dhe të huaj, duke nxitur banorët të investojnë në turizëm familjar.
Festa e Trëndafilave ka mbledhur këtë vit qindra pjesëmarrës nga Pojani dhe zonat përreth, duke promovuar jo vetëm traditën e kultivimit të luleve, por edhe vlerat kulturore e turistike të gjithë krahinës.
