Policia e Korçës ka shpallur në kërkim një 38-vjeçar nga qyteti i Pogradecit, pasi dyshohet se ka shpërdoruar detyrën dhe ka përvetësuar një shumë të konsiderueshme parash.
Sipas njoftimit zyrtar nga Drejtoria Vendore e Policisë Korçë, shtetasi B. M., me detyrë menaxher i një dyqani për pajisje elektroshtëpiake, ka arritur të fshehë të ardhurat për një periudhë të caktuar kohe, duke shkaktuar dëm financiar ndaj subjektit ku ishte i punësuar. Policia ka referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Korçë.
Ndaj tij është ngritur akuza për veprën penale të “Shpërdorimit të detyrës” dhe “Fshehjes së të ardhurave”.
Hetimet për këtë çështje vijojnë, ndërsa forcat e rendit janë në kërkim të 38-vjeçarit për ta vënë përpara drejtësisë.
