Një histori frymëzuese po vjen nga Bilishti. Para dy vitesh, Alisja Kaso nisi të luante volejboll me ekipet e shkollës falë projektit të Komitetit Olimpik Kombëtar Shqiptar (KOKSH). Pas përfundimit të kampionatit me ekipet shkollore, talenti i saj ra në sy dhe u thirr nga Skënderbeu për t’u bashkuar me ekipet e moshave U-18 dhe U-20.
Rezultati ishte i jashtëzakonshëm: vitin e kaluar, Alisja shpalli veten kampione e Shqipërisë me të dyja grupmoshat, duke dhënë një kontribut të rëndësishëm për suksesin e skuadrës korçare.
Trajnerët e Skënderbeut e kanë vlerësuar për ecurinë e shpejtë dhe përparimin teknik që ka arritur brenda një kohe kaq të shkurtër. Edhe pse ende i duhet punë për të kaluar me ekipin e parë, cilësitë e saj fizike dhe përkushtimi i madh po e dallojnë nga bashkëmoshataret.
“Kam avantazh kërcimin, sepse kam shumë forcë për moshën dhe gjininë time. Dëshira është e madhe, sepse që e vogël kam pasion sportin. Tani shohim përpara,” – thotë Alisja Kaso, duke treguar vendosmërinë për të bërë hapin e madh drejt ekipit të parë të Skënderbeut.
