Ashtu siç ishte përfolur prej javësh, Salim Abubakar është zyrtarisht futbollisti më i ri i Skënderbeut. 22-vjeçari nga Nigeria, i aftë të luajë si mesfushor mbrojtës dhe si mbrojtës qendror apo i majtë, vjen nga klubi italian Sassuolo, duke u konsideruar si një përforcim i rëndësishëm për repartin difensiv të skuadrës korçare.
I lindur më 7 prill 2003, Abubakar është formuar si futbollist në Itali. Në moshën 17-vjeçare iu bashkua Sassuolos, ku ka luajtur fillimisht me ekipin U-20, ndërsa është aktivizuar edhe me ekipin e Pergolettese në formë huazimi. Sezonin e fundit ai është rikthyer në organikën e Sassuolos, përpara se të vendoste të transferohej në Korçë.
Ajo që e bën të vlefshëm për Skënderbeun është polivalenca e tij në fushë: mund të luajë si qendërmbrojtës, mbrojtës i majtë, apo mesfushor para mbrojtjes. Abubakar vlerësohet për vendosjen taktike, forcën fizike dhe qetësinë në ndërtimin e lojës.
Ky transferim konfirmon qartë ambicien e Skënderbeut për të ndërtuar një ekip të fortë dhe të disiplinuar nga prapavija, në synim të rikthimit në elitën e futbollit shqiptar.
